CAMARACUM

CAMARACUM

primo memoratum Tab. Theodos inter Pontem Scaldis et Baiacum Nerviorum ponitur: Aethico, inter Nemetacum et Bagacum: item inter Nemetacum, et Augustam Veromanduorum. In priscis Notit. provinc. ac civitat. Galliae, inter urbes provinc. Belgicae secundae, sextum tenet locum: in recentioribus, quartum; post Remos nempe, Suessionas et Catalaunos, sed ante Veromanduos et Atrebates. Capta a Chlodione Francorum Rege, post quem Ragnacharius ibi sedit. Incendiis vastata est a Nortmannis, A. C. 881. Belgi Camerick, Gall. Cambray. Incolae Cameracenses, Gall. Cambresiens. Urbs ex Episcopali facta est Archiepiscopalis et Metropolitana, sub Philippo II. cuius Archiepiscopus et Dux Comes Cameracesii et Princeps S. Romani Imperii nuncupatur. Caput est pagi cognominis, qui Gall. le Cambresis dicitur: olim Nerviorum fuit, sedes prisca Episcopi, donec ut dictum altius evecta, cum prius una cum Atrebatis et Turnaco Remorum urbem pro Metropoli haberet, iam linguae Francicae seu Wallonicae nova Metropolis facta, quinque eiusdem linguae civitates sibi subiectas habet, Atrebatensem et Turnacensem veteres, Audomarensem, Iprensem et Namurcensem novas, e quibus Civitas S. Audomari vel Sithiu et Ipra partem antiquae dioeceseos Tarvennae Morinorum paulo ante eversae, cui prius attribuebantur, continent. Hadr. Vales. Notit. Gall. Vide quoque Cameracum. Coeterum continentur dioeceseos Camaracensis finibus Sonegiae cum Monte Castrilucio, Condate, Attho, Querceto vel Casneto, Landericiis, Avesnis, cumque Binchio, Bello Monte, Brenna Brenne, Melbodio, ac Cimaco. Hadr. Vales. in voce Sonegiae.